بنیامین نەتانیاهۆ بەناو سەرۆک وەزیرانی رژێمی داگیرکەری سەهیۆنی رایگەیاند کە ئەوان ڕێککەوتنێک قبوڵ ناکەن کە کۆتایی بە داگیرکاری لە غەززە بهێنێت.

نەتانیاهۆی داگیرکەر رایگەیاند کە ئەوان رێککەوتنێک قبوڵ ناکەن کە بە تەواوی کۆتایی بە هێرش و داگیرکارییەکانیان لە کەرتی غەززە بهێنێت.

نەتانیاهۆی داگیرکەر لە پەیامێکی ڤیدیۆیی کە بڵاوی کردەوە، سەبارەت بە هێرشەکانی سەر کەرتی غەززە و دانوستانەکانی ئاگربەست و ئەگەری هێرش بۆ سەر ئێران لێدوانێکی دا. نەتانیاهۆ دووپاتی کردەوە کە مەرجەکانی حەماس بۆ کۆتاییهێنان بە هێرشەکانی داگیرکەران بۆ سەر کەرتی غەززە و داگیرکارییە سەربازییەکانیان قبوڵ ناکەن و ئەگەرنا مەحاڵە بەدیهێنانی "پلانی دۆناڵد ترەمپ سەرۆکی ئەمریکا بۆ دەربەدەرکردنی خەڵکی غەززە."

نەتانیاهۆی داگیرکەر ئاماژەی بەوەدا کە ئامانجی سەرەکییان دیپۆرتکردنەوەی فەلەستینییەکانی غەززەیە بۆ وڵاتانی دیکە لەژێر ناوی "کۆچی خۆبەخشانە".

نەتانیاهۆ ئیدیعای کرد کە حەماس ئەو ڕێککەوتنەی ڕەتکردەوە کە لە کۆتایی هەفتەی ڕابردوودا پێشنیاریان کردبوو بۆ گۆڕینەوەی ئەسیرەکان، کە بریتی بوو لە ئازادکردنی نیوەی ئەسیرە داگیرکەرەکان کە لە ژیاندا ماون و گەیاندنی تەرمی بەشێک لە ئەسیرە مردووەکان.

نووسینگەی بەناو سەرۆکوەزیرانی داگیرکەر رایگەیاند، بە پێچەوانەی لێدوانەکانی نەتانیاهۆ، تا ئێستا هیچ وەڵامێکی فەرمی لە لایەن حەماسەوە وەرنەگیراوەتەوە.(İLKHA)